რა შემთხვევაშია ”პორშე” ნაღდი ”პორშე”? ამ კითხვაზე პასუხის გაცემა არცისე ადვილია და განსაკუთრებით მას მერე გართულდა, რაც ”ფოლკსვაგენის” კონცერნში შესულმა ლეგენდარულმა გერმანულმა მარკამ Panamera-ს და Cayenne-ის სახით სედანებისა და ქროსოვერების გამოშვება დაიწყო და ამ კლასის ავტომობილებს უფრო ყიდის, ვიდრე წმინდა სისხლის სპორტულ მანქანებს. თანაც, ევროპაში დიზელის ძრავების მქონე Cayenne-სა და Panamera-ს უფრო ყიდულობენ...
”პორშეს” ძირძველ ფანებს აპრილიდან ჭმუნვის ახალი საბაბი მიეცემათ, რადგან სწორედ აპრილიდან გამოვა და საქართველოშიც ჩამოვა (პორშეს ოფიციალური წარმომადგენელი ჩვენთან თეგეტა მოტორსია) ”პორშეს” პირველი კომპაქტური ქროსოვერი ”მაკანი” (Macan), რომელიც Audi Q5-ის ბაზაზე შეიქმნა. ახლა უკვე მხოლოდ კრიტიკოსები აღარ ხედავენ იმის საშიშორებას, რომ ”პორშე” ფულს შოულობს, დედაარსს კი კარგავს.
Porsche Macan-ის მაქსიმალური სიმძლავრე 400 ცხენის ძალაა, Audi Q5-ისა კი - 272 ცხენის ძალა. სამაგიეროდ, ”აუდი” Q5-ს ჰიბრიდის სახითაც აწარმოებს
სდექ! - ყვირიან თავად ”პორშეს” წარმომადგენლები და გაიძახიან: ახალი ”მაკანი” კომპაქტური SUV-ების სეგმენტში პირველი სპორტული ავტომობილი და, რა თქმა უნდა, ყველაფრით ნაღდი ”პორშეაო”.
არის თუ არა ეს მხოლოდ PR-გამოძახილი? იმისათვის, რომ ამ კითხვაზე მაქსიმალურად ამომწურავად გვეპასუხა, Porsche Macan-სა და Audi Q5-ს ძარის მიღმა ღრმად ჩავხედეთ, ისინი ერთმანეთს ავტოდრომზეც შევადარეთ და უგზოობის პირობებშიც.
წინ, ახალი სიმაღლეების დასაპყრობად: ”მაკანით” ”პორშეს” მარტო ”აუდის” გასწრება როდი უნდა - ცუფენჰაუზენელებს წელიწადში მინიმუმ 200 000 ეგზემპლარის გაყიდვა აქვთ დაგეგმილი
რით განსხვავდება Porsche Macan Audi Q5-ისგან?
დიზაინით დავიწყოთ. როცა ”მაკანი” და Q5 გვერდიგვერდ დგანან, რთულია იმის დაჯერება, რომ ორივე ერთსა და იმავე პლატფორმაზეა ბაზირებული - მიუხედავად იმისა, რომ სიგრძეცა და ბაზაც თითქმის იდენტური აქვთ. ”პორშეს” დიზაინერმა მიტია ბორკერტმა ”მაკანს” თავისი საკუთარი იდენტობა მიანიჭა. ”მაკანი” ბრტყელია, ხარივით ჯანმრთელად გამოიყურება და მოხდენილად ვარდნადი სახურავით გაცილებით სპორტული და თანამედროვე ჩანს, ვიდრე Audi Q5, რომელიც ვიზუალური თვალსაზრისით უკვე ასაკშია შესული.
”მაკანს” დიზაინის კუთხით ოდნავადაც არ ეტყობა, რომ Audi Q5-ის ბაზაზეა შექმნილი
იგივე ეხება ინტერიერსაც. ”მაკანის” სალონი მასზე გაცილებით ძვირადღირებული ”კაიენისას” ჰგავს - ტახომეტრი შუაში აქვს და მარცხენა მხრიდან იქოქება. ”პორშეს” ინტერიერში ყველაფერი ქორფად და სუფთადაა დამუშავებული - გარემო ფასს შეესაბამება. რაც შეეხება ”აუდის”: ორი აზრი არ არსებობს, ხარისხიანი სალონი აქვს, მაგრამ Q5-ის ინტერიერი ”მაკანთან” შედარებით ცოტათი გამტვრიანებულია.
”პორშეს” ინტერიერი ”აუდისაზე” მდიდრულად გამოიყურება, მულტიფუნქციური საჭე ახალია. ცენტრალურ კონსოლზე ბევრ ღილაკს მიჩვევა სჭირდება
მუხლების წინ ადგილი იმდენივეა, რამდენიც ”აუდიში”, თავს ზემოთ კი, ვარდნადი სახურავის გამო ნაკლები სივრცეა
კოკპიტი ვიზუალურად მოძველებულია, თუმცა მასალების ხარისხი მაღალია, დამუშავება - კარგი. ცენტრალური, დასატრიალებელი და დასაჭერი ღილაკით მომსახურება უპრობლემოდ ფუნქციონირებს
”აუდის” სალონის უკანა ნაწილში თვით თითქმის 2-მეტრიანი შტეფან ფოსვინკელისთვისაც კი საკმარისი სივრცეა. თავს ზემოთ აქ ”მაკანზე” მეტი ადგილი რჩება
ოპტიკურ განსხვავებზე მნიშვნელოვანი ისაა, რომ ”პორშემ” ”აუდის” Quattro-ამძრავზე უარი თქვა. ამის მიზეზი ის იყო, რომ ”აუდის” თითქმის ლეგენდარულ სრულ ამძრაობას ერთ ღერძზე სიმძლავრის 100 პროცენტის განაწილება არ შეუძლია, ”პორშეს” ინჟინრებს კი სწორედ ეს უნდოდათ, რადგან ”მაკანი” მაქსიმალურად დინამიკური უნდა ყოფილიყო და მხოლოდ ასე შეძლებდა ”პორშე” მოხვევის მინიმუმ 10 პროცენტით გაპირდაპირებას. ამასთან, ”პორშე” ამ სეგმენტში პირველი მწარმოებელია, რომელიც პნევმატიკურ დაკიდებას გვთავაზობს (ფასი: 2630 ევრო), რითაც ისეთი ნაზავი იქმნება, რომელიც ავტოდრომზეც გამორჩეული იქნება და უგზოობის პირობებშიც.
”პორშეს” მაღალი მოთხოვნები ვერც ”აუდის” ბენზინის ძრავებმა დააკმაყოფილეს. ამიტომაცაა, რომ ”პორშეს” პატარა ქროსოვერი ახალი, 6-ცილინდრიანი Biturbo (Macan S) და 3,6-ლიტრიანი (Macan Turbo) აგრეგატებით იწარმოება. ამრიგად, ”პორშემ” ”აუდის” თაროდან მხოლოდ დიზელის 6-ცილინდრიანი აგრეგატი და 7-საფეხურიანი ორმაგი შეჭიდების გადაცემათა კოლოფი ჩამოიღო.
მაკანი Audi Q5-ზე სპორტულად დადის?
ერთმნიშვნელოვნად, დიახ! დაკეტილ წრიულ ტრასაზე ”პორშეს” ინჟინრებმა ”მაკანის” შემოწმების შესაძლებლობა მოგვცეს და ამაში ცხადად დავრწმუნდით. ”პორშეს” პატარა ქროსოვერს ვიწრო მოსახვევებში ”აუდიზე” მნიშვნელოვნად უკეთესი რეაქცია აქვს, რაც მისი მაქსიმალურად მოქნილი სრული ამძრაობის დამსახურებაა, ხოლო გრძელ მოსასვევებში შესვლის შემდეგ თითქმის ნაღდი სპორტული ავტომობილივით, მოხდენილი დრიფტით გამოდის. ჩვენც თამამად ვიტყვით, რომ ასეთი სპორტულობა ამ კლასში მართლაც პირველი შემთხვევაა და რომ არა ჯდომის მაღალი პოზიცია, ასი პროცენტით დავიჯერებდით, რომ ნაღდ სპორტულ მანქანაში ვისხედით.
”პორშემ” ამ მოდელით SUV-სეგმენტი გააფართოვა. კომპაქტური Macan-ის გაყიდვები აპრილიდან დაიწყება
ღერძები Q5-დან უცვლელად გადაიტანეს, სამაგიეროდ, ”პორშემ” ”მაკანს” საკუთარი სამუხრუჭე სისტემა უსახსოვრა. ცხადია, ინჟინრები ამას იმით განმარტავენ, რომ ”პორშეს” მუხრუჭები განსაკუთრებით მოკლე სამუხრუჭე მანძილით გამოირჩევა. ”მაკანმა” ეს ტრეკზე დაამტკიცა კიდეც და აქვე ვთქვათ, რომ მოგვიანებით Macan Turbo-ში ცნობილი და ძვირფასი კერამიკული მუხრუჭებიც ხელმისაწვდომი იქნება.
Macan-ში ”პორშეს” ამბიციებს გაყიდვების სტარტზევე შემოთავაზებული ძრავებიც შეესაბამება. თვით საწყისი, საბაზო აგრეგატიც კი მძლავრია: 340 ცხენის ძალა, 460 ნმ (1450 ბრ/წთ). ეს 6-ცილინდრიანი ძრავა დაბალ ბრუნებზეც ეფექტურია, მაღალ დიაპაზონზე კი ისე იქცევა, როგორც წმინდა სისხლის სპორტულ ავტომობილს შეეფერება - მის ხმაზე აღარაფერს ვამბობთ. Turbo-ს, რომელიც ”პანამერადან” გადმოტანილ 3,6-ლიტრიანს შეუხამეს, რა თქმა უნდა, უფრო მეტი პოტენციალი აქვს - 400 ცხენის ძალა და 550-ნიუტონმეტრიანი ბრუნის მომენტი ამგვარად მოტორიზებულ ”მაკანს” მსოფლიოში ყველაზე სწრაფ კომპაქტურ ქროსოვერად აქცევს. აღსანიშნავია ისიც, რომ თვით დიზელის აგრეგატიც კი ძალიან სწრაფად ხურდება - მართალია, ისეთი ხმა არ აქვს, როგორითაც ბენზინის აგრეგატი გამოირჩევა, მაგრამ სიმძლავრის ნაკლებობას ნამდვილად არ უჩივის. ამასთან, დიზელის ძრავის შემთხვევაში ”პორშე” საშუალოდ 100 კილომეტრზე მხოლოდ 6,1-ლიტრიან ხარჯს გვპირდება. ამრიგად, დიზელის ძრავის მქონე ”მაკანის” ყიდვა ამ მოდელის შემთხვევაში ყველაზე გონივრული გადაწყვეტილებაა.
”აუდის” ქროსოვერი 2008 წლიდან იყიდება, 2012 წელს კი მცირე ფეისლიფტი ჩაუტარეს. შესაბამისად, Q5 ვიზუალურად მოძველებულია
ჩვენ ყველაზე მეტად მაინც იმ ფაქტმა გაგვაოცა, რომ ”პორშე” ”აუდიზე” კომფორტულია. თუკი Q5 უსწორმასწორობებზე ცოტათი უხეშია, ”მაკანი” გასაოცარ მოქნილობას ინარჩუნებს.
Porsche Macan Audi Q5-ს უგზოობაზეც კი სჯობია! ეს ერთის მხრივ პნევმატიკური დაკიდების დამსახურებაა, რაც უგზოობის პირობებში კლირენსის გაზრდის საშუალებას იძლევა, მეორე მხრივ კი, უშუალოდ მისი სრული ამძრაობის ტექნიკისა, რომელიც ექსტრემალურ სიტუაციაში ამძრაობის ბრუნის მომენტის 100 პროცენტს ერთი ბორბლისკენ მიმართავს! ეს იმას ნიშნავს, რომ ”მაკანი” იმ შემთხვევაშიც წავა, თუ ოთხიდან სამი ბორბლით მოლიპულ გზაზე აღმოჩნდება! ამ ორომტრიალში ყველაზე უცნაური ისაა, რომ ქროსოვერის, მით უმეტეს კომპაქტური ქროსოვერის მყიდველთა აბსოლუტური უმრაბლესობა ამ ნიჭს არასდროს გამოიყენებს...
უგზოობის პირობებში არც ”აუდია” უიღბლო, მაგრამ მთელი ძალის ერთი ბორბლისკენ გაშვება არ შეუძლია, განსაკუთრებული ოფროუდი კი არც ერთს უნდა მოუწყო და არც მეორეს. ისინი ამისთვის არ შეუქმნიათ.
არის თუ არა მაკანი შესაბამის Q5-ზე ძვირი?
რა თქმა უნდა! ბენზინის ძრავების მქონე ეგზემპლარებს თამამად ვერ შევადარებთ, რადგან სიმძლავრების კუთხით სერიოზული განსხვავებებია. სამაგიეროდ, დიზელის ძრავის მქონე ვერსიების შედარება შეიძლება და ამ მხრივ, იდენტურად მოტორიზებული ”პორშე მაკანი” დაახლოებით 7000 ევროთი ძვირია, ვიდრე Audi A5 3.0 TDI Clean Diesel. მოდელები დამატებითი ოფციებისგანაც რომ გავწმინდოთ, განსხვავება 5000 ევრო იქნება. თუ ”პორშეს” მყიდველი ფასიანი აღჭურვილობების სიაში ბევრ რამეს მოხაზავს, ფასი ძალიან სწრაფად ავარდება 70 000 ევრომდე! აი, ამ მხრივ კი ”პორშე” ისევ ისეთია, როგორიც ყოველთვის იყო: სპორტული, მდიდრული და ძვირადღირებული პროდუქტი.
დასკვნა
მართლაც საოცარია ის ფაქტი, რომ იდენტურ ბაზაზე აწყობილი ”მაკანი” და Q5 ერთმანეთისგან ასე რადიკალურად განსხვავდებიან. ”პორშე” თავისი ძვირადღირებული სრული ამძრაობითა და პნევმატიკური დაკიდებით მნიშვნელოვნად სპორტულად და კომფორტულად დადის. ვისაც ”მაკანის” ყიდვა შეუძლია, მართალია, ბევრის გადახდა მოუწევს, მაგრამ უბრალოდ გაცილებით უკეთეს ქროსოვერს მიიღებს.
შტეფან ფოსვინკელი
რატომაა პორშე სრული ამძრაობა უკეთესი?
Macan-ზე მუშაობისას ”პორშეს” ინჟინრები მალევე მიხვდნენ, რომ ”აუდის” Quattro-ამძრავი მათ მოთხოვნებს ვერ დააკმაყოფილებდა. თუმცა Quattro-ს დაწუნების მთავარი მიზეზი არ იყო ის, რომ ამ სისტემას სიმძლავრის მოქნილად გადანაწილება არ შეუძლია. ამაზე მნიშვნელოვანი ის იყო, რომ Quattro-ს შემთხვევაში ”პორშეს” საბურავების ნარევზე უარის თქმა მოუწევდა, რადგან ”აუდის” დიფერენციალი ყოველთვის მარტივად დაიბლოკებოდა. სიმძლავრის 100 პროცენტის ერთ ღერძზე გადანაწილება შესაძლებელი გახადა 911-დან და Cayenne-დან ნაცნობმა ე.წ. Hang-on-ამძრაობამ, რაც დამატებით კოლოფსაც გულისხმობს. ამიტომაც გახდა მოხვევის სისტემა 10 პროცენტით პირდაპირი. თუკი ”აუდი” ჩვეულებრივ რეჟიმში უკანა ბორბლებზე ამძრავის სიმძლავრის მხოლოდ 60 პროცენტს მიმართავს, ”პორშეს” შემთხვევაში ეს მაჩვენებელი 80 პროცენტს შეადგენს. შესაბამისად, ”მაკანი” გაცილებით სპორტულად დადის და მოსახვევებშიც უფრო რეაქტიულია. დამატებით 1488 ევროს გადახდის შემთხვევაში უკანა ღერძის დიფერენციალის აქტიურ ბლოკირებასაც მიიღებთ. ”მაკანის” სრულ ამძრაობას უპირატესობა უგზოობის პირობებშიც აქვს, რადგან ექსტრემალურ ვითარებაში მთელი სიმძლავრის ერთი ბორბლისკენ მიმართვა შეუძლია, რაც უკეთეს გამავლობას ნიშნავს.
