გაიცანით ინდური "ჰამერი"

ინდურმა კომპანია „SP დიზაინსმა“, რომელიც ავტომობილების ტიუნინგზეა სპეციალიზებული, საინტერესო პროექტი შეიმუშავა - ინდური „მაჰინდრა თარის“ ბაზაზე, ახალი მოდელი შექმნა, რომელიც ლეგენდარულ სამხედრო ავტომობილ „ჰამერს“ მოგაგონებთ. მსგავსება ძირითადად რადიატორის ცხაურასა და კუთხოვან ფორმებში აისახება, თუმცა პირველი დანახვისას, ადამიანი მას სწორედ „ჰამერს“ შეადარებს.

Auto Bild

„SP დიზაინსმა“ მთლიანად შეცვალა დონორი ავტომობილის ძარა. ახალი მოდელის გარეგნობის მთავარი დამახასიათებელი ნიშანი მისი რადიატორია, რომელსაც სქელი ვერტიკალური ზოლები აქვს. მის ორივე კიდეში ცხაურისვე ფოსოებში, პროექციული ფარები განლაგდა. წინ ბამპერს რთული ფორმა აქვს და მის ქვედა ნაწილში, კაპოტქვეშა სივრცის ფსევდო დამცავი ფირფიტა განლაგდა. ბორბლების თაღებს კუთხოვანი ფორმები აქვს. მათგან წინების წინა ნაწილი გახსნილია. ავტომობილი მასიურ, 21-დუიმიან ბორბლებზე დგას.

ინტერიერში „ტოიოტა ეტიოსის“ ბაზაზე დამზადებული მაჩვენებლების დაფა განლაგდა. საჭის რგოლი „SP დიზაინსმა“ შექმნა. ცენტრალურ კონსოლზე მულტიმედიასისტემის მომცრო სენსორული ეკრანია. წინა სავარძლების უკან, სახურავზე დამაგრებულია ციფრული ტელეეკრანი. პედლები ალუმინისგანაა დამზადებული.

Auto Bild

„SP დიზაინსმა“ თავისი „ჰამერის“ აღჭურვილობა არ გაამხილა, თუმცა სავარაუდოდ, ავტომობილს მამოძრავებელ ძალას „მაჰინდრას“ 2.5-ლიტრიანი ძრავა ანიჭებს, რომელიც 105 ცხენის ძალას (3 800 ბრ/წთ-ზე) და 247 ნუტონმეტრს (1 800-2 000 ბრ/წთ-ს შორის დიაპაზონში) გამოიმუშავებს. აგრეგატთან წყვილში მექანიკური გადაცემათა კოლოფი მუშაობს, რომელსაც მხოლოდ 5 საფეხური აქვს.

Auto Bild