კემპერების გამოფენაზე, რომელიც დიუსელდორფში გაიმართა, ”ფოლკსვაგენმა” ახალი სტუდიური მოდელი VW California XXL წარმოადგინა. ეს გახლავთ სახლი-მანქანად გადაკეთებული VW Crafter, რომელსაც AUTO BILD ახლოს გაგაცნობთ.



ახალი კემპერების გამოფენა დიუსელდორფში 26 აგვისტოს დაიწყო და 3 სექტემბრამდე გრძელდება. ერთ-ერთი ყველაზე საინტერესო მოდელი ”ფოლკსვაგენმა” წარმოადგინა:

• ეს გახლავთ ახალი Crafter-ის ბაზაზე შექმნილი California XXL.

ამ საოჯახო-სამოგზაურო ავტომობილს უამრავი თანამედროვე ასისტენტ-სისტემა აქვს და როგორც გერმანელები ირწმუნებიან, განსაკუთრებით ეკონომიური და კომფორტულია.

• გერმანელები განსაკუთრებით დიდი პანორამული ჭერით ამაყობენ.

დასაძინებელი სივრცე უკანაა (2000 x 1700 მმ). ”ფოლკსვაგენის” ახალ კემპერში ორშვილიანი ოჯახი თავისუფლად დაეტევა. ინტერიერში შეხვდებით ისეთ ინოვაციურ გადაწყვეტილებებს, როგორიცაა მაგალითად აბაზანა, რომლის მოხსნაც შეიძლება (თუკი ის არ გჭირდებათ).



California XXL-ის კაპოტის ქვეშ ”ფოლკსვაგენ კრაფტერის” 177-ცხენისძალიანი დიზელის ძრავა მუშაობს. ავტომობილი სრულამძრავიანია და აქვს იატაკის გათბობა, რაც იმას ნიშნავს, რომ მფლობელს ზამთარშიც გამოადგება. ვოლფსბურგელებს ჯერჯერობით არაფერი უთქვამთ იმის შესახებ, თუ როდის გამოვა California XXL-ის სერიული ვერსია და რა ეღირება ასეთი კემპერი. ცხადია, იაფი ნამდვილად არ იქნება.

• კიდევ რამდენიმე დეტალი: სტუდიური მოდელი საშუალობაზიანი ”კრაფტერის” პლატფორმაზეა აგებული.

ეს იმას ნიშნავს, რომ მისი სიგრძე ბამპერიდან ბამპერამდე 5,9 მეტრია. თუმცა ზედა ნახევარში სიგრძე გაზრდილია, რათა დასაწოლი სიბრტყე უფრო დიდი გამოსულიყო. ამრიგად, საერთო სიგრძე 6,2 მეტრი გამოდის. სიგანე 2,03 მეტრია (გარეთა სარკეებთან ერთად 2,42 მეტრი). California XXL სიმაღლეში 2,9 მეტრი გახლავთ. სალონში ადამიანის სადგომი სიმაღლე 2,2 მეტრამდე გამოდის.





იხილეთ ფოტოგალერეა:
გერმანული საოჯახო კემპერები